Përshkrimi i rolit

Vendndodhja: Pozicioni ushtrohet në Zyrat Qendrore OBC.

Synimi i pozicionit

Arkitekti mbulon përgatitjen, bashkërendimin dhe ndjekjen e projekteve arkitektonike në çdo fazë të zhvillimit dhe zbatimit, duke garantuar respektimin e kërkesave funksionale, teknike, estetike dhe ligjore. Përmes koordinimit të mirë me disiplinat e tjera të projektimit, dokumentacionit teknik cilësor dhe zbatimit të saktë në kantier, ky rol ndihmon në përfundimin me sukses të projekteve të kompanisë.

Përgjegjësitë

• Drejton projektin dhe etapat e planifikimit për Projekte Arkitektonike dhe Komplekse.
• Bashkërendon ecurinë e Projektit Arkitektonik me Projektin Konstruktiv dhe MEP, duke ndjekur vazhdimisht integrimin e tyre në projektin përfundimtar për të përmbushur qëllimet dhe objektivat e Projektit.
• Diskuton me Eprorin vendimet që duhen marrë gjatë përgatitjes së projektit.
• Kujdeset që projekti të respektojë rregulloret në fuqi dhe standardet e planifikimit.
• Përgatit vizatimet e projekt-zbatimit, duke përfshirë dhe ndërthurur saktë projektet teknike mekanike, elektrike dhe konstruktive me Projektin Arkitektonik.
• Harton vizatimet për çdo detaj të projektit, pas konsultimeve të nevojshme me stafin teknik, nënkontraktorët ose furnitorët.
• Ndihmon eprorin gjatë takimeve me institucionet, në mënyrë që projekti të pasqyrojë komentet e tyre dhe të plotësojë kërkesat institucionale.
• Përgatit së bashku me Departamentin Teknik dokumentacionin për tenderimin e punimeve, përfshirë vizatimet, llogaritjet e sasive dhe specifikimet teknike, dhe kujdeset për realizimin efektiv të projektit brenda parashikimeve kohore dhe buxhetore.
• Përgatit projektin Arkitektonik "As-Built" dhe ofron kontributin e vet për departamentet paralele.
• Ndjek dhe mbikëqyr punën e arkitektëve Junior dhe Graphic Desing, duke siguruar përputhjen me kërkesat e Projektit.
• I dorëzon Departamentit Marketing-Shitje materialet e projektit për komunikimin e produktit dhe vë në dispozicion informacionin grafik të nevojshëm.
• Bashkërendon ndryshimet në projektet instalatore dhe, së bashku me Departamentin Teknik, vlerëson preventivat për këto ndryshime.
• Kryen kontrolle të rregullta në kantier për të verifikuar ecurinë, cilësinë dhe përputhjen e zbatimit me projektin, duke informuar Eprorin.
• Përgatit albumin e shitjes së njësive dhe kujdeset për kontrollin dhe përditësimin e tij të vazhdueshëm.

Kualifikimet e nevojshme

• Kërkohet përfundimi i Studimeve të Larta për Arkitekturë, në nivelet Bachelor + Master.
• Nevojiten të paktën 5 vite përvojë pune; përvoja në kompani ndërtimi përbën preferencë.
• Kërkohet përvojë në hartimin dhe ndjekjen e Projekteve Komplekse dhe Polifunksionale.