Union Bank ka zhvilluar aktivitetin e saj me sukses në tregun bankar shqiptar për 20 vite, duke u pozicionuar si një institucion i besueshëm, i qëndrueshëm dhe me rezultate shumë të mira. Me një rrjet prej 33 degësh dhe 72 ATM-sh në qytetet kryesore të vendit, banka u shërben mbi 130,000 klientëve me standarde profesionale dhe të qëndrueshme. Që prej nisjes së veprimtarisë në vitin 2006, Union Bank ka shënuar rritje të pandërprerë, duke arritur aktualisht mbi 100 miliard lekë asete totale.

Kultura e punës në bankë mbështetet te diversiteti, përfshirja dhe mundësitë e barabarta për zhvillim profesional, ku secili punonjës konsiderohet pjesë e rëndësishme e suksesit të përbashkët. Banka investon vazhdimisht në ngritjen profesionale dhe trajnimin e stafit, me synimin për të ofruar një përvojë sa më cilësore bankare për klientët.

Banka vlerëson profesionistë të kualifikuar, të përkushtuar dhe besnikë, dhe kërkon të plotësojë një vend pune në Departamentin e Zhvillimit të Produkteve Retail, pranë Drejtorisë së Përgjithshme në Tiranë, për rolin:

Manaxher Produkti

Qëllimi i përgjithshëm i punës:

Ky rol mban përgjegjësi për planifikimin e ciklit të produkteve për klientët e bankës, duke mbledhur dhe renditur sipas përparësisë kërkesat që lidhen me produktet dhe nevojat e klientëve. Pozicioni përcakton vizionin e produkteve dhe bashkëpunon ngushtë me shitjet, segmentimin e klientëve, marketingun, operacionet dhe njësitë e tjera të bankës, me qëllim arritjen e objektivave të të ardhurave dhe kënaqësisë së klientit. Gjithashtu, siguron që produktet të jenë në përputhje me strategjinë e përgjithshme të bankës dhe me rezultatet e synuara, duke kontribuar edhe në përmirësimin e vazhdueshëm të proceseve të brendshme që lidhen me cilësinë e produkteve në UB.

Detyrat

Përgjegjësitë kryesore:

• Harton dhe zbaton strategjinë dhe planet për produktet e klientëve në përputhje me objektivat dhe drejtimin strategjik të bankës, duke respektuar gjithmonë kërkesat rregullatore për çdo produkt që mbulon.
• Punon me struktura të ndryshme të bankës dhe me partnerë të jashtëm për të garantuar zbatimin e produkteve të reja, ndryshimet në produktet ekzistuese ose programe të ndryshme, me fokus te realizimi i objektivave, ruajtja e përfitueshmërisë së produktit, reputacionit të bankës, standardit të ofruar dhe perceptimit të klientit.
• Zhvillon modele dhe raporte që ndihmojnë në menaxhimin dhe monitorimin e performancës dhe përfitueshmërisë së produkteve të kredive dhe fondeve sipas segmenteve të klientëve, duke synuar rritjen e përfitueshmërisë dhe depërtimit të tyre sipas llojit të klientelës.
• Përgatit dhe koncepton katalogun e produkteve. Në mbështetje të analizës së karakteristikave të produkteve të kredive dhe fondeve, përshkruan në detaje, së bashku me strukturat e tjera të bankës, procesin e ecurisë së produktit, “Product Journey”.
• Shqyrton periodikisht të gjitha produktet dhe propozon ndryshime ose produkte të reja duke u bazuar në performancën e tyre, zhvillimet e tregut dhe nevojat e klientëve. Ka përgjegjësi për nisjen dhe ndjekjen e procesit të ndryshimeve ose të implementimit të produkteve të reja. Po ashtu, përgatit programe komunikimi për realizimin e objektivave të vendosura.
• Bashkëpunon në nivel Departamenti, Divizioni dhe Institucioni për të ofruar grupe produktesh të përshtatshme për segmente të caktuara klientësh, duke marrë parasysh sjelljen e tyre konsumatore dhe strategjinë e komunikimit.
• Angazhohet dhe drejton projekte të ndryshme që lidhen me produktet nën menaxhim ose me zhvillimet teknologjike të bankës.
• Mban komunikim të vazhdueshëm me degët për mbledhjen dhe shpërndarjen e informacionit mbi produktet që administron dhe kujdeset që të gjitha strukturat që komunikojnë me klientët të informohen për produktet e reja ose për ndryshimet e produkteve ekzistuese. Merr pjesë edhe në trajnimin e stafit për produktet nën menaxhim, si edhe në projektet që lidhen me sistemet dhe kanalet e komunikimit të produktit.
• Kryen analiza tregu në mënyrë periodike dhe përditëson kushtet e tregut për të gjitha produktet, duke informuar në nivel Divizioni për ndryshimet në treg që kanë të bëjnë me produktet e fondeve, kredive dhe fushatat aktive.
• Ndërton dhe administron të gjitha proceset që lidhen me programe të ndryshme në bashkëpunim me palë të treta.

Kualifikimet

Kërkesat e profilit:

• Diplomë nga Fakulteti Ekonomik ose nga fusha të ngjashme.
• Eksperienca e mëparshme prej 3 viteve në një rol të përafërt përbën avantazh.
• Aftësi të spikatura në zhvillimin e produkteve bankare.
• Njohje të mira të produkteve bankare, veçanërisht të kredive dhe fondeve, si edhe aftësi të mira teknike.
• Njohuri mbi politikat dhe procedurat bankare.
• Shkathtësi shumë të mira në komunikimin verbal dhe me shkrim.
• Aftësi shumë të mira në organizimin dhe menaxhimin e kohës.
• Aftësi të forta për punë në ekip dhe për të realizuar punë cilësore me nivel minimal mbikëqyrjeje.
• Motivim për të punuar pa supervizim të vazhdueshëm.
• Gatishmëri për të mësuar dhe për t’u zhvilluar më tej.
• Njohuri të mira të programeve bazë të MS Office, si edhe të gjuhës Angleze.

Dokumentet e kërkuara

• CV
• Letër “Shprehje Interesi” për Pozicionin